Protected by Copyscape DMCA Takedown Notice Infringement Search Tool

बुधवार, २७ मे, २०१५

गझल

धाट उभे करण्या जन्माचा काला करणारे
कुठे लोपले…. नवे कोण हे हुरडा करणारे
पेटवायला चूल निखारे वेचतात बहुधा
उन्हामधे रणरणत्या प्लास्टिक गोळा करणारे
एक लाट येऊन विस्कटू शकते जाणुनही
दंग कसे इतके वाळूचा किल्ला करणारे
मांडल्याच नाहीत मागण्या संगतवार कुणी
हात रिकामे हलवत गेले गलका करणारे
चलू पुढे की मागे परतू हेच कळत नाही
ये म्हणणारे जितके तितके जा जा करणारे
जरी शाश्वती नव्हती पिल्ले राहतील का ही
केवळ श्रद्धेखातर झटले खोपा करणारे
मी स्वप्नांची पायवाट रुळवत आलो इथवर
बघू कधी येते वास्तवही धुरळा करणारे
---------
सुमारपण व्यासंगाच्या वर्खात बुडवल्यावर
भेटत गेले बक्कळ दादा बाबा करणारे

- विजय दिनकर पाटील