दोन गझला

१.

मीर वली वा गालिबचे वंशज कोणी
येथेही आहेत म्हणे दिग्गज कोणी

रोजच देश नव्याने जन्मत असताना
अर्ध्यावर आणून ठेवला ध्वज कोणी

चहूकडे दिसतात पारधी फिरताना
उत्सुक नाही बनायला सावज कोणी

किती उधळशील व्यर्थ मोती शब्दांचे
दिला तुला हा लाखांचा ऐवज कोणी

लाड पुरेसे जन्माने केलेच कुठे
पाठव मृत्यू नावाचा अग्रज कोणी

२.

उत्सव कशाचे साजरे झाले
वातावरण तर बोचरे झाले

चौकात रहदारी सुकर झाली
सिग्नल बसवला ते बरे झाले

अभ्यास काही काळिजे आता
पुष्कळ त-हांचे चेहरे झाले

काही समुद्रांच्या नद्या झाल्या
काही नद्यांचेही झरे झाले

कोणास केले अलविदा आपण
की हात इतके कापरे झाले